ბითაძის ვრცელი ინტერვიუ ნაკრებსა და NBA-ზე

48
basketusa.com-მა “ინდიანას” ცენტრ გოგა ბითაძესთან ერთობ საინტერესო ინტერვიუ გამოაქვეყნა:
“ევროლიგის გასული სეზონის ამომავალმა ვარსკვლავმა გოგა ბითაძემ ჯერ უნდა მოახერხოს სათადარიგოთა სკამიდამ შემადგენლობაში გადანაცვლება, მაგრამ როგორც მან basket usa-ს უთხრა, “ინდიანას” ქართველი ახალწვეული ხელების ჩამოშვებას არ აპირებს. ის თავის დროს ელის და მოთმინებით აგრძელებს მუშაობას.
გოგა მხოლოდ 20 წლისაა, მაგრამ ძველ კონტინენტზე კარგი რეზიუმე აქვს. ლუკა დონჩიჩივით მწვერვალებს არ შესთამაშებია, თუმცა ახალგაზრდა ქართველმა, რომელიც ინდიანაში დაეშვა, ევროპის სამ ქვეყანასა და ოთხ კლუბში და ევროლიგაში თამაში NBA-ს ტრამპლინისთვის გამოიყენა.
გოგა 16 წლიდან მაღალ დონეზე გამოდის, NBA-ში პირველი კამპანიისას კი ლოგიკურ და მოსალოდნელ პრობლემას განიცდის – მატჩში ჩატარებულ 9 წუთში საშუალოდ 3 ქულასა და 2 მოხსნას აგროვებს. ის მშვიდად ელის თავის დროს ნეიტ მაკმილანის როტაციაში.
– გოგა, როგორ აფასებთ თქვენს დებიუტს NBA-ში?
– ძალიან კარგად. მე უბრალოდ ვაგრძელებ NBA-ს თამაშთან ადაპტაციას, რომელიც ევროპულისგან აშკარად განსხვავებულია. ყოველდღე ახალ რამეებს ვსწავლობ. ვცდილობ პროგრესირებასა და გუნდის დახმარებას.
– ეს თქვენს იდეას შეესაბამება?
– სანამ აქ გადმოვიდოდი, NBA-ს მატჩებს ხშირად ვუყურებდი. ასე რომ, ვიცი, ეს რას წარმოადგენს. თუმცა, თამაშისას მიხვდები, რომ გაცილებით სწრაფად თამაშობენ. ალბათ, ყველაზე მეტად ამან გამაოცა.

– რა არის თქვენს ადაპტაციის პროცესში ყველაზე რთული?

– ბევრი მატჩია. მით უმეტეს, ყოველი მათგანი განსხვავებულია, მაგრამ მწვრთნელები და თანაგუნდელები მეხმარებიან, ყველაფერი კარგად მიდის.

– სეზონის დასაწყისში მეტი სათამაშო დრო გქონდათ, ვიდრე ახლა. ამას როგორ უმკლავდებით?
– ეს მწვრთნელის გადასაწყვეტია. რაც შემეხება მე, როდესაც ჩემს სახელს დაასახელებს, უბრალოდ ახალი მომენტისთვის უნდა ვიყო მზად. ეს ძნელი არ არის, უბრალოდ მზადყოფნა მმართებს.
 რა უნდა გააკეთოთ იმისათვის, რათა როტაციას დაუბრუნდეთ?
– კიდევ უფრო თავდადებულად უნდა ვიშრომო. ვიცი, ჩემი დრო დადგება.

– როგორ ფიქრობთ, ევროლიგამ NBA-სთვის შეგამზადათ?

– ცხადია, ძალიან დამეხმარა. ეს მსოფლიოში საუკეთესო მეორე ლიგაა. პროგრესირებაში ძალიან დამეხმარა, ვინაიდან ვეტერანებთან და ნიჭიერ კალათბურთელებთან ვიბრძოდი.

– სწორედ პოდგორიცაში (სადაც დებიუტისას ევროლიგაზე საშუალოდ მატჩში 12 ქულასა და 6 მოხსნას აგროვებდით) იგრძენით, რომ ნახტომისთვის მზად იყავით – ამ შემთხვევაში ოკეანის გაღმა?
– დიახ, ეს ჩემთვის მნიშვნელოვანი ნაბიჯი იყო, რამეთუ სწორედ იქ ვიგრძენი, რომ NBA-ში თამაში შემეძლო. ვფიქრობ, მზად ვარ. ეს ყველაზე შესაფერისი დრო იყო.

– ევროლიგასა და NBA-ს შორის ყველაზე დიდი განსხვავება? ფიზიკური ორთბრძოლები?

– ფიზიკური ორთაბრძოლები ევროპაშიც მართლაც ძალიან სერიოზულია. იქ ძირითადად დაცვასა და მეტოქის შეჩერებაზე ფიქრობ, აქ კი – სირბილსა და ქულებზე.

– ძნელია ამ დაცვითი სტილიდან NBA-ს უფრო “ღიაზე” გადასვლა?
– კალათბურთში ნებისმიერ ლიგაში დაცვაში თამაში უნდა გეხერხებოდეს. აქ ბურთის ფლობა მეტია, მატჩი 48 წუთი გრძელდება. ეს მსოფლიოს საუკეთესო ლიგაა, დომინანტური.

– კარიერა 16 წლის ასაკში ВТБ ლიგაში დაიწყეთ, თბილისში, ძალიან ახალგაზრდულ ასაკში დებიუტი, შემდეგ NBA-ში როგორ შეიძლება დაგეხმაროთ?

– ჭაბუკობის ასაკიდან მივეჩვიე პროფესიონალი სპორტსმენის ცხოვრებას, თამაშებს, მგზავრობას და ამან ბევრი რამ მასწავლა. ეს ისაა, რაც მთელი კარიერის მანძილზე მეხმარებოდა და მეხმარება. მიხარია, რომ ასე ახალგაზრდა NBA-ში ვასპარეზობ.
– ამერიკის ლიგის ინტენსიურ რიტმს როგორ უმკლავდებით?
– ბევრი მატჩი, ბევრი მგზავრობა, მაგრამ პერსონალი გვეხმარება. ეს გაცილებით ადვილია, ვიდრე ევროპაში. ლოდინი არ გიწევს. კერძო თვითმფრინავით დავფრინავთ, ლამაზ სასტუმროებში ვჩერდებით – ეს შესანიშნავი ცხოვრებაა.

 

Sportall.Ge
– ზაზა ფაჩულია ჩვენ გვარწმუნებდა, რომ თქვენში ნაკრების მომავალ ლიდერს ხედავს. როგორ ფიქრობთ, ეს ისაა, რაც თქვენი მაღალი მიზანია?
– ცხადია, ყოველთვის, როდესაც ჩემს ქვეყანას დავჭირდები, მზად ვიქნები, დავეხმარო. ნაკრებში გულიანად ვთამაშობ. ვიცი, ზაზას დონემდე მისაღწევად ბევრი მუშაობა მმართებს.
– თორნიკე შენგელიასთან და გიორგი შერმადინთან ერთად მოწინააღმდეგეებთან ფარქვეშ უპირატესობა გექნებათ…
– დიახ, ჩვენ დიდი გუნდი გვყავს. ამას გარდა, მომავალი ევრობასკეტი საქართველოში ჩატარდება, თბილისში, რაც ჩვენთვის დიდი უპირატესობა იქნება. იმედი მაქვს, ვითამაშებ.”
წყარო: sportall.ge
SHARE