ვეცდებით, ქართველებს სათამაშო განწყობა გავუფუჭოთ… ვიმედოვნებთ, რომ ესტონეთს მოვუგებთ… დღევანდელი შეხვედრის წინასამატჩო კომენტარები

105

ტალინში ერთა ლიგის მეორე გათამაშების მატჩამდე ესტონეთთან მატჩამდე, საქართველოს ეროვნული ნაკრების მთავარ მწვრთნელთან, ვლადიმირ ვაისთან ერთად, მედიასთან შეხვედრაზე თორნიკე ოქრიაშვილიც გამოცხადდა.

ფამაგუსტას „ანორთოსისის“ შემტევმა ნახევარმცველმა პირველი შეხვედრის მნიშვნელობაზე ილაპარაკა.

„ნაკრებში თამაში ყველას მოგვენატრა. რა თქმა უნდა, ფეხბურთი მაყურებლის გარეშე რთული სათამაშოა. თუმცა, კარგი მოლოდინი გვაქვს. ვიმედოვნებთ, რომ შეხვედრა ჩვენი გამარჯვებით დასრულდება. ჩვენ განვიხილეთ ესტონეთის თამაშები, შევაფასეთ როგორც ძლიერი ისე სუსტი მხარეები, მაგრამ დღეს ამაზე არ ვისაუბრებ და ყველაფერი შეხვედრაზე გამოჩნდება“, – ამბობს თორნიკე ოქრიაშვილი.

რა გავლენა მოახდინა საქართველოს ნაკრებზე ფეხბურთში ამჟამად მოქმედმა საგანგებო შეზღუდვებმა – საზოგადოებრივმა აკრძალვებმა და სხვა მკაცრმა ზომებმა? 28 წლის შემტევმა ამ კითხვასაც უპასუხა.

„გამოცდილი მოთამაშეები დაგვაკლდა და შეკრება მოგვენატრა, რადგან ბოლოს ჩვენ ერთმანეთს ათი თვის წინ შევხვდით. გულშემატკივრის ნაკლებობა ერთი მხრივ წარმოუდგენელია, მეორეს მხრივ კი, უბრალოდ, მათ გარეშე თამაში ძალიან ძნელია. მაგრამ ჩვენ უნდა ვითამაშოთ. ეს ჯერ კიდევ ფეხბურთია”, – თქვა ოქრიაშვილმა.

რაც შეეხება ესტონეთს, მათი ნაკრების კაპიტანი კონსტანტინე ვასილიევი იმედოვნებს, რომ მისი გუნდი ერთა ლიგის ჯგუფური ეტაპის პირველ შეხვედრაში საქართველოს ნაკრებს მთავარ უპირატესობას წაართმევს.

„საქართველოს ნაკრები ყოველთვის ფიზიკურად ძლიერი და ტექნიკური მოთამაშეებითაა დაკომპლექტებული. ადრეც გვითამაშია და მათი სტილი კარგად ვიცით. შესაძლოა, სლოვაკმა მთავარმა მწვრთნელმა მათი თამაში ცოტათი დააბალანსა, მაგრამ საქართველოს კოზირი ჩვენთვის დიდი ხანია ცნობილია. მათი საფეხბურთო კულტურაც ვიცით, ისინი მოედანზე ქედმაღლები არიან. ჩვენ მათი „კოზირების“ განეიტრალებას შევეცდებით“, – ამბობს ვასილიევი.

36 წლის ვეტერანმა ნახევარმცველმა იმ სტრატეგიაზეც ილაპარაკა, რომელმაც, მისი აზრით, ესტონეთის ნაკრებს წარმატება უნდა მოუტანოს: „ჩვენ ბურთი უნდა გავაკონტროლოთ და თუ ქართველებს უბურთოდ დავტოვებთ, ამით სათამაშო განწყობას გავუფუჭებთ”.

ვასიელიევი გულდაწყვეტილია, რომ გულშემატკივრები არ გაამხნევებენ, მაგრამ საშინაო არენის უპირატესობის გამოყენებას იემდოვნებს: „ფეხბურთი მაყურებლისთვისაა, რომლისგანაც ფეხბურთელმა ენერგია უნდა მიიღოს. სამწუხაროდ, ისინი შეხვედრას ვერ დაესწრებიან. თუმცა, საშინაო არენის უპირატესობა ჯერ არავის გაუუქმებია. „ა ლე კოკ არენა“ ისევ ჩვენი სტადიონია, სადაც მოედნის ყველა გოჯს ვიცნობთ. . საქართველოს კი მგზავრობა და ვითარებასთან შეგუება მოუწევს. ეს ჩვენი უპირატესობა იქნება“.

ესტონეთის ნაკრები საქართველოს C2 ჯგუფში შაბათს, 5 სექტემბერს, ერთა ლიგის პირველ მატჩში უმასპინძლებს. მატჩის პირდაპირი ტრანსლაცია საქართველოს პირველ არხზე 20:00 საათზე დაიწყება.

წყარო: 1tv.ge

SHARE