მარიამ ბოლქვაძემ რეკორდსმენს აჯობა

135

21 წლის ქართველი ჩოგბურთელი მარიამ ბოლქვაძე არაბეთის გაერთიანებული საამიროების უდიდეს ქალაქ დუბაიში იმყოფება, სადაც საერთაშორისო ტურნირზე (საპრიზო ფონდი 100 ათასი დოლარი) წარმატებული სტარტი აიღო.

მსოფლიო რეიტინგში 155-ე ადგილზე მყოფი ბოლქვაძე საწყის რაუნდში 27 წლის ესპანელ ხეორხინა გარსია-პერესს (262-ე) გაეჯიბრა და 3:6, 6:3, 6:1 სძლია.

გარსია-პერესს კარიერის საუკეთესო შედეგი შარშან ჰქონდა, როდესაც 124-ე პოზიციას უწია, საჩოგბურთო სამყაროს კი თავი უძლიერესი მოწოდებით გააცნო.

რაოდენ უცნაურიც არ უნდა იყოს, სწორედ მსოფლიოს 262-ე ჩოგანს ეკუთვნის ქალთა ჩოგბურთისთვის უსწრაფესი მოწოდება. 2018 წელს უნგრეთის ღია პირველობაზე თამაშისას ხეორხინამ ბურთი 220 კმ/სთ-ით გაგზავნა და ამით, ბელარუსი არინა საბალენკას (214 კმ/სთ) რეკორდი გადაფარა, მე-3 მაჩვენებელი კი გერმანელ საბინ ლისიცკის (210.8 კმ/სთ) ეკუთვნის.

მე-2 წრეში მარიამის მეტოქე კიდევ ერთი ესპანელი, 23 წლის სარა სორიბეს ტორმო იქნება, რომელსაც ჩვენებური შარშან შეხვედრია და მანჩესტერის 100-ათასიან ტურნირზე 2:6, 5:7 აქვს წაგებული, ამდენად, რევანშის აღების შანსი ექნება.

ბოლქვაძე დუბაიში ძალებს წყვილებშიც სცდის, სადაც სოფიო შაფათავას ტრადიციულ პარტნიორ ემილი ვებლი-სმითთან (დიდი ბრიტანეთი) ერთად ითამაშებს. ქართველი და ბრიტანელი ჩოგბურთელები რუმინელებს (ელენა ბოგდანი-პატრისია მარია ტიგი) ეთამაშებიან.

ვთქვათ ისიც, რომ დუბაის ტურნირზე ქალთა რეიტინგის მოწინავე ასეულის ერთბაშად 8 წევრი თამაშობს, პირველ ნომრად კი მსოფლიოს 38-ე ჩოგანი კრისტინა მლადენოვიჩი (საფრანგეთი) გახლავთ განთესილი.

წყარო: popsport.ge

SHARE