საქართველოს ნაკრების მთავარმა მწვრთნელმა ვლადიმირ ვაისმა ჩრდილოეთ მაკედონიასთან მატჩის შემდეგ სინანული ვერ დამალა, რომ მისმა გუნდმა ვერ მოიგო სკოპიეში და ამით ჯგუფში გალიდერების მშვენიერი შანსი ხელიდან გაუშვა.
“გასვლაზე კონკურენტთან ქულა მოვიპოვეთ, რაც, ერთი შეხედვით, კარგი შედეგია. მაგრამ მე ვერ ვიქნები ამ ქულით ბედნიერი, რადგან ჩრდილოეთ მაკედონიამ 10 ფეხბურთელით ითამაშა და ბურთი მაინც გაგვიტანა. იყო თუ არა ეს პენალტი, კომენტარს არ გავაკეთებ. მაგრამ ჩვენ კიდევ რამდენიმე გოლის გატანა შეგვეძლო, რადგან საამისოდ ბევრი შანსი გვქონდა“, – განაცხადა ვაისმა.
სლოვაკმა სპეციალისტმა ტრადიციას არ უღალატა და მეტოქის თამაშის შეფასებისას კომპლიმენტები არ დაიშურა, თუმცა აღნიშნა, რომ მის გუნდს მეტოქეზე მეტი დანაკლისი ჰქონდა.
“ჩრდილოეთ მაკედონიამ სამი წამყვანი ფეხბურთელის გარეშე ითამაშა, ჩვენ კი 6–7 ფეხბურთელი დაგვაკლდა. ჩვენ ვაჩვენეთ კარგი და ემოციური თამაში ნახევარდაცვაში, მცირე პრობლემა პირველი ტაიმის შუაში გვქონდა, რადგან მარცხენა ფლანგიდან ალიოსკი ძალიან კარგად თამაშობდა. მაგრამ მეორე ტაიმში უკეთ გამოვიყურებოდით, 3–4 ძალიან კარგი საგოლე შანსი გვქონდა, მაგრამ… მხოლოდ ერთი გოლი გავიტანეთ. ამიტომ, ეს შედეგი ისევ და ისევ ჩვენი ბრალია“.
ვაისმა მაკედონიელთა საუკეთესო მოთამაშე გორან პანდევი შეაქო: “მან თავისი თამაშით ჩემზე დღესაც საუკეთესო შთაბეჭდილება დატოვა. როგორ ითამაშა მთელი მატჩი! ის ფანტასტიკური ფეხბურთელია, ყველაფრისთვის ქებას ისმახურებს – 37 წლის ასაკში როგორ თამაშობს, როგორ იჭერს ბურთს, როგორ მოძრაობს… პანდევი ჩრდილოეთ მაკედონიის ნაკრებისთვის ძალიან მნიშვნელოვანი მოთამაშე. ერთი თვე გვაქვს მოსაფიქრებლად, როგორ შევაჩეროთ ის თბილისში“.
საქართველოს ნაკრების მთავარმა მწვრთნელმა ევრო 2020-ის საკვალიფიკაციო პლეი ოფის ფინალზეც გააკეთა კომენტარი, რომელიც 12 ნოემბერს ამავე გუნდებს შორის თბილისში გაიმართება: “ჩვენ ახლა გულდაწყვეტილები ვართ, მაგრამ ერთ თვეში ვნახავთ, რა მოხდება. ევროპის ჩემპიონატზე მოხვედრის შანსი 50/50-ზეა. ჩვენ ვთამაშობთ სახლში. ვნახოთ, როგორი ვითარება იქნება კორონავირუსის მხრივ და მისცემენ თუ არა გულშემატკივრებს დასწრების უფლებას“.
წყარო: lelo.ge
