ქუთაისის “ტორპედოში” ფინანსურმა კრიზისმა პიკს მიაღწია. ქალაქის მერიასა და გულშემატკივრებს სურთ, რომ კლუბს დროულად ეშველოს… მაგრამ როგორ?
ამის შესახებ კვირას ტელეკომპანია “იმედის” სპორტულ გადაცემაში (“სპორტი იმედზე“) ლევან კობიაშვილმა ილაპარაკა. საქართველოს ფეხბურთის ფედერაციის პრეზიდენტის თქმით, ქუთაისელი გულშემატკივრები “ტორპედოში” არსებულ ვითარებაზე სრულ ინფორმაციას არ ფლობენ…
“არ ვიცი, ჩემი მისამართით უკმაყოფილება რამდენად შეიძლება იყოს. ამას თავი დავანებოთ, ჩემთვის მთავარი ეს არ არის. მთავარი ისაა, რომ ყველამ შევძლოთ და გუნდი ამ პრობლემიდან გამოვიყვანოთ. ადრეცმითქვამს, რომ “ტორპედო” ჩემთვის ის კლუბია, რომელიც ზოგადად ჩვენს ჩემპიონატს განასახიერებს და ჩემპიონატი მის გარეშე, ტრადიციებით, გულშემატკივრითა და ყველაფრით, ძნელი აღსაქმელი იქნება…
მდგომარეობა ურთულესია. ქუთაისში რამდენჯერმე ჩავედი და გულშემატკივარს შევხვდი. ინფორმაციის ნაკლებობის გამო, მათ სიმართლე ბოლომდე არ იცოდნენ. დღეს გამოჩნდა შესაძლებლობა, რომ “ტორპედოს” რაღაცით დავეხმაროთ. იქნება ეს კერძო ორგანიზაცია თუ ასე შემდეგ. მე ვხედავ იმის შესაძლებლობას, რომ მომდევნო დღეებში და კვირებში კლუბში რეალურად რაღაც ფინანსები შევიდეს და სხვა რეალობა დადგეს…
რაც შეეხება პირობებს, ეს ყველაზე ნაკლები პრობლემაა. ადრეც მითქვამს და ახლაც გავიმეორებ, რომ ფეხბურთის ფედერაცია მზად არის, ასეთ ვითარებაში კლუბებს დაეხმაროს. რაღაც გამოჩნდება და “ტორპედო” იარსებებს – ეს არის მიზანი და მე მგონია, რომ ამ მიზანს მივაღწევთ“, – თქვა ლევან კობიაშვილმა გადაცემაში.
ქუთაისის “ტორპედოს” ფანკლუბი (“ჩვენ ვართ ტორპედო”) კობიაშვილის კომენტარს გამოეხმაურა:
“როგორც ლევან კობიაშვილი ამბობს, ჩვენ, ფანები, ბევრ თემასთან დაკავშირებით სწორად ინფორმირებულები არ ვიყავით და ისეთ რაღაცეებს ვამბობდით, რაც რეალობას აცდენილი იყო. როცა გუნდი გეშლება, რთულია თავის გაკონტროლება. ამ დროს შენს კლუბზე ნათქვამიყველანაირი ჭორი თუ სიმართლე გაშინებს. ამის შემდეგ სფფ-ის პრეზიდენტი ქუთაისში ჩამოვიდა და ფანებს პირადად შეგვხვდა. შექმნილ ვითარებაზე ვილაპარაკეთ, ბევრი რამ გავარკვიეთ და პირობა მოგვცა, რომ ყველაფერს გააკეთებს იმისთვის, რომ “ტორპედო” ეროვნულ ლიგაში თამაშობდეს. “იმედშიც” გარკვევით ამბობს, რომ ქუთაისის “ტორპედო” ყველამ ერთობლივი ძალებით უნდა გადავარჩინოთ. ისიც ახსნა, ჩვენი გუნდის ეროვნულ ლიგაში ასპარეზობა რაოდენ მნიშვნელოვანია“, – წერია ფანკლუბის განცახდებაში.
ფანებმა კობიაშვილის გამოსვლის იმ ნაწილს მიაქციეს ყურადღება, რომელიც “ტორპედოს” დაფინანსების წყაროს ეხებოდა: “რაც შეეხება ქალაქის მერიას, ამასაც კარგად ხსნის კობიაშვილი, რომ მას ყველანაირი უფლება აქვს, კლუბისთვის საარსებო თანხები მოიძიოს, რაც ხელფასის დარიგებას გულისხმობს. იმედია, ყველაფერი დალაგდება და გუნდს ერთად დგომით და ერთად გადავარჩენთ“.
შეგახსენებთ, რომ “ტორპედომ” ფეხბურთელების მედიასთან შეხვედრა დააანონსა, მაგრამ შემდეგ ეს შეხვედრა გადაიდო – ეს ქუთაისური კლუბის ოფიციალური გვერდის მიერ გავრცელებული მორიგი ინფორმაციიდან გახდა ცნობილი.
“გავრცელებული განცხადების შემდეგ ფეხბურთელებს შორის კიდევ ერთი შეკრება გაიმართა. 16 სექტემბერს “ტორპედოს” სტუმრად “საბურთალოსთან” მნიშვნელოვანი მატჩი ელის. ჩემპიონატი დასასრულს უახლოვდება, “ტორპედო” კი ევროტურნირებზე მოსახვედრად იბრძვის. შესაბამისად, ახლა მისთვის თითოეული ქულა უძვირფასესია. ფეხბურთელებმა ამჯერადაც გაითვალისწინეს კლუბისა და გულშემატკივრის ინტერესი. თითოეული მათგანი გრძნობს განსაკუთრებულ პასუხისმგებლობას ქომაგთა წინაშე, რომელიც მათგან მხოლოდ წარმატებას ელის. აქედან გამომდინარე, ფეხბურთელებმა მიიღეს გადაწყვეტილება, რომ გუნდი ჩვეულებრივად ივარჯიშებს, მოახლოებული მატჩისთვის სათანადოდ მოემზადება, განცხადება კი “საბურთალოსთან” თამაშის შემდეგ გაკეთდება”, – წერია კლუბის ოფიციალურ გვერდზე.
შეგახსენებთ, რომ გუშინ გავრცელებული ცნობის მიხედვით, ქუთაისური კლუბის ფეხბურთელები მედიასთან შეხვედრასა და არსებულ პრობლემებზე ღიად ლაპარაკს აპირებდნენ. მოკლედ, ტორპედოელებისა და გუნდის მთავარი მწვრთნელის, კახა ჩხეტიანის შეხვედრა მედიასთან ორშაბათს, თბილისში, “საბურთალოსთან” მატჩის (დასაწყისი 16 საათზე) შემდეგაა მოსალოდნელი.
წყარო: lelo.ge
