სარაგბო 6 ერი, რომელში ჩართვასაც საქართველოს ნაკრები არაერთი წელია ცდილობს, შესაძლოა, მართლაც გაფართოვდეს, ოღონდ, ევროპელების გარეშე, რაც ცხადია, ბორჯღალოსანთა აღზევებასაც გამორიცხავს.
პირველმა აღნიშნულის შესახებ ბრიტანულმა Daily Mail-მა დაწერა, მის თანახმად, 4 ერის დატოვებასა და ევროპულ რაგბში ჩართვაზე ფიქრობს სამხრეთ აფრიკის რაგბის კავშირი.
როგორც ირკვევა, “ქურციკებს” ერთბაშად რამდენიმე მიზეზი ამოძრავებთ.
უფრო კომფორტული სასაათო სარტყელი – მაქსიმუმ 2 საათი სხვაობა აფრიკის დროსთან.
შედეგად, ტელეტრანსლაციების უფრო კომფორტულ პერიოდში განთავსება.
სამხრეთაფრიკელი მორაგბეების სიმრავლე ევროპულ კლუბებში.
სამხრეთ აფრიკას 6 ერში ჩართვის შემთხვევაში, მცირე ლოჯისტიკური პრობლემები კი შეექმნება, თუმცა, როგორც ინფორმაციაშია ნათქვამი, იქ ყველაფრისთვის მზად არიან.
აი, Express.co.uk-ის ცნობით კი, დიდი შანსია, მომავალ წლებში, აფრიკელთა გარდა, 6 ერში თავი ფიჯის ნაკრებმაც ამოჰყოს. ამაზე პირველი მინიშნება ტურნირზე საფრანგეთის წარმომადგენელმა კლოდ აშერმა გააკეთა.
“დარწმუნებული ვარ, რომ ეს ნეგატიურ შედეგებს არ მოგვიტანს. გვესმის, რომ 6 ერის კალენდრის შეცვლა და ტურების დამატება მოგვიწევს, თუმცა, თუკი ეს საჭიროა, რატომაც არა? სხვა საქმეა, რომ ეს, ალბათ, 3-4 წელიწადში მოხდება”.
როგორც Daily Express იუწყება, თუკი “მფრინავი ფიჯელების” 6 ერში ჩართვა მართლაც მოხდა, ისინი საშინაო მატჩებს საფრანგეთში ჩაატარებენ, ამდენად, სხვა გუნდებს მოგზაურობასთან დაკავშირებული დისკომფორტი არ შეექმნებათ.
წყარო: popsport.ge
