საჩხერის “ჩიხურასთან” მატჩის შემდეგ ბათუმის “დინამოს“ მეპატრონის საგანგებო განცხადება გავრცელდა, სადაც არჩილ ბერიძე ამბობდა, რომ, სავარაუდოდ, კლუბს და მთლიანად ქართულ ფეხბურთს დატოვებს…
“შექმნილი ვითარებიდან გამომდინარე, ხვალ (შაბათს – რედ) გავაკეთებთ სპეციალურ განცხადებას და, სავარაუდოდ, დავტოვებთ ქართულ ფეხბურთს და ბათუმის “დინამოს“, – თქვა არჩილ ბერიძემ ბათუმის “დინამოს” ოფიციალურ საიტთან საუბრისას.
შეგახსენებთ, რომ საჩხერის “ჩიხურამ” ეროვნული ლიგის ფინიშამდე სამი ტურით ადრე ბათუმის “დინამო” 2:0 დაამარცხა და აჭარელთა საჩემპიონო შანსებს სერიოზული დარტყმა მიაყენა. ბათუმელთა თქმით, მე-60 წუთზე “ჩიხურას” მოთამაშე უნდა გაეძევებინათ და, საერთოდ, მიიჩნევენ, რომ გადამწყვეტ მომენტში მსაჯობა არაობიექტური იყო.
ბერიძესთან ინტერვიუ ჩაწერა საზოგადოებრივი მაუწყებლის “პირველმა არხმა”. საინტერესო იყო, რეალურად რა გახდა ამ განცხადების წინაპირობა.
“ჯობია, დროზე წავიდე. ეტყობა, ასეც უნდათ. მოვა ვიღაც და ჩემი წასვლა მისთვის იქნება მაგალითი, ხოლო ამ ნაბიჯით ქართული ფეხბურთი უფრო გაძლიერდება…
ინვესტიციაზე უარს არ ვიტყვი, ბოლო თეთრს გავიღებ და გუნდს ყველაფერი ექნება. მაგრამ ჯანმრთელობას ვიღაც მსაჯს არ გადავაყოლებ…
გადის მსაჯი მოედანზე და აპრიორი იცის, რას გააკეთებს. პირველ ტაიმში მეტოქის მცველს საჯარიმოში ბურთი ხელზე მოხვდა და პენალტი არ დანიშნა. კარგი, ჩავთვალეთ, რომ შეეშალა – ვის არ შეშლია?! მაგრამ მეორე ტაიმში მეტოქეს კაცი არ გაუგდო, საჩხერელ ფეხბურთელს კი მეორე ყვითელი არ მისცა, რადგან იცოდა, გასაგდები იქნებოდა...
ვის ვეჭიდავო?! არ შემიძლია ამ ბინძურ თამაშში ყოფნა! მირჩევნია, ახლა მაგინონ, ვიდრე არაფერი შევიმჩნიო. ვერავინ დამარწმუნებს, რომ აქ ყველაფერში დამნაშავე ფეხბურთის ფედერაციაა – ეს ხალხი არაფერ შუაშია, კიკაჩეიშვილს არავინ ეტყოდა – ბათუმელებს ხელი შეუშალეო. ეს არ მოხდებოდა...
…მაგრამ ფეხბურთის ფედერაციის დანაშაული ის არის, რომ ივანწმინდის უვარგის მოედანზე გვათამაშა...
5 წელია ფულს არავინ დებდა, მე გამოვჩნდი და ახლა დაიწყეს ფულის ჩადება. ეს თუ არ უნდათ, თუ არ უნდათ ბათუმში ფეხბურთის ბუმი, მაშინ აქ მე არაფერი მესაქმება.
ჩემს ემოციებს და შრომას არავინ უყურებს. მეუბნებოდნენ თანაინვესტორები – ფეხბურთში ფულის ჩადება არ გვინდაო და მე მაინც დავითანხმე. მაგრამ ვის გამო? ვიღაც ნაძირალას გადავაყოლო გუნდის ამბიცია და ნერვები?! ეს არის მარაზმი, რომელიც დროულად უნდა ვამხილოთ“, – თქვა ბერიძემ.
წყარო: lelo.ge
