ევრო 2020-ის პლეი ოფებისთვის საქართველოს ნაკრების მომზადება დღეს ყველაზე მნიშვნელოვანი და აქტუალური საკითხია – იქნება თუ არა ბელარუსთან გიორგი ჩაკვეტაძე, შეიცვლის თუ არა კლუბს გიორგი ქვილითაია, როგორ ფორმაში იქნებიან ზოგადად მოთამაშეები? ეს ახლა ყველაზე სასიცოცხლო თემებია…
ერთადერთი, რაზეც ჩვენ არ ვღელავთ ან ნაკლებად ვღელავთ, კვიპროსულ “ანორთოსისში” მოთამაშე ქართველების საკითხია. საქართველოს გარეთ მთელ მსოფლიოში არ არის მეორე ისეთი კლუბი, სადაც საქართველოს ნაკრების საქმე კეთდება. ეს არ არის გასაკვირი, რადგან იქ მთავარი მწვრთნელი თემურ ქეცბაიაა.
საბედნიეროდ, მის ხელში ყველა ქართველი ფორმაში შედის. ლეგიონის მიმოხილვიდან უკვე იცით, ქეცბაიამ ახნას “ეთნიკოსთან” ოთხივე ჩვენებური ძირითად შემადგენლობაში დააყენა. თორნიკე ოქრიაშვილმა “ანორთოსისში” გადასვლის შემდეგ საუკეთესო მატჩი მე-10 ტურში “ეთნიკოსის” წინაააღმდეგ ჩაატარა. ქართველების გუნდმა შინ 2:1 მოიგო. მართალია, ოქრიაშვილს არ გაუტანია, მაგრამ მატჩის მთავარი გმირი იყო და არაერთი მომენტიც შექმნა თავისი საფირმო ინდივიდუალური მოქმედებების შედეგად.
თავად განსაჯეთ: 27 წლის ქართველმა კარში ორჯერ ისე დაარტყა, მეტოქე მცველმა და მეკარემ გადაარჩინეს, ერთხელაც კარს ააცილა, 3-ჯერ ძელს მოარტყა და ერთხელ პენალტი გამოიმუშავა. “ოქრის” იღბალმა ზურგი აშკარად აქცია, მაგრამ “ანორთოსისის” ვებგვერდმა მატჩის სამ საუკეთესო ფეხბურთელს შორის დაასახელა და ამათგან მთლად საუკეთესო – გულშემატკივრებმა უნდა შეარჩიონ. ოქრიაშვილის ფორმაში შესვლა ძალიან გვაიმედებს, საქართველოს ნაკრებისთვის ის დიდი ძალა იქნება.
ფორმაში შესვლას ცდილობს ნიკა კაჭარავაც, კარგად ათამაშდა ბუბა დაუშვილიც… რაც შეეხება გიორგი ლორიას, მან ყველა 9 მატჩი ჩაატარა, მხოლოდ 5 გოლი გაუშვა და 10 ტურის შემდეგ (ფამაგუსტელებს ერთი თამაში გამოტოვებული აქვთ) ჩემპიონატის საუკეთესო მეკარეებს შორის მოხვდა. გამოცემა ShootandGoal-ის ჩატარებული გამოკითხვით, ორშაბათის საღამომდე “ანორთოსისის” 32 წლის ქართველი კიპერი დიდი უპირატესობით ლიდერობდა – მას მხარს გამოკითხულთა 61 პროცენტი უჭერდა…
აი ლინკი, რომელზეც შეგიძლიათ ხმა მისცეთ გიორგი ლორიას – https://shootandgoal.cyprustimes.com/dimoskopisi-pios-ine-o-kalyteros-termatofylakas-tou-protathlimatos-psifiste/?fbclid=IwAR2uyurgYWG2im2XOuaVI_F3rNt2-HHtxEyRTEtl76lIcAkJ3TS9uwNkFFY
წყარო: lelo.ge
