ბოლო პერიოდში გავრცელდა ინფორმაცია, თითქოს ნიკა კაჭარავას პოლონეთში, პოზნანის “ლეხში” იწვევენ. კვიპროსულმა გამოცემებმა ამ თემას საკმაოდ დიდი ყურადღება დაუთმეს, თუმცა ამ წერილების შინაარსი ერთმანეთისგან განსხვავდება…
ქეცბაია მზადაა…
…მაგალითად, გამოცემა philenews.com წერს, რომ ნიკა კაჭარავას ძირითად შემადგენლობაში, შესაძლოა, კონკურენტი გამოუჩნდეს.
“ბოლო დროს, პოლონეთში ბევრი ინფორმაცია გავრცელდა, თითქოს, პოზნანის “ლეხი” ნიკა კაჭარავას ამ ქვეყანაში აბრუნებს. ფამაგუსტის “ანორთოსისში” ამბობენ, რომ ამის შესახებ არაფერი იციან და რომ ქართველი თავდამსხმელის დათმობაზე არანაირი წინადადება არ მიუღიათ. 26 წლის ფეხბურთელი პოლონეთში სულაც არ არის უცხო. 2017-18 წლების სეზონში ის კილჩეს “კორონაში” თამაშობდა.
ტანმაღალი ფორვარდისთვის ახლა გახურებული სეზონია, “ანორთოსისში” ძირითადი შემადგენლობისთვის ბრძოლა მოიგო და თემურ ქეცბაია მას თავდასხმას ანდობს. მას “ანორთოსისთან” კონტრაქტი მომდევნო ზაფხულს ეწურება და ფამაგუსტელები თანამშრომლობის გახანგრძლივების წინაპირობას ამზადებენ. ქართველ თავდამსხმელს სასაცილო თანხას უხდიდნენ. ახლა ადმინისტრაცია იძულებული გახდა, პირობები შეეცვალა“, – წერია philenews.com-ის წერილში.
ამავე დროს, გამოცემა წერს, რომ ქართველის თავზე შავი ღრუბლები მოიქუფრა: “თემურ ქეცბაია ცდილობს, გუნდის შემოქმედებითი მხარე გააუმჯობესოს და ამ მიზნით აპირებს, დაიმატოს სავას გენცოღლუ და ანტონის პაპადოპულოსი. ეს ყველაფერი იმაზე მეტყველებს, რომ ქართველი მწვრთნელი მზადაა, კაჭარავა შემადგენლობიდან ამოაგდოს“.
მილიონის საფასურად…
“ლარნაკა სპორტი” საპირისპიროს ამტკიცებს. გამოცემამ ფამაგუსტელთა ქართველ თავდამსხმელზე წერილი გამოაქვეყნა. ამტკიცებენ, რომ ნიკა კაჭარავა გუნდში რჩება და კლუბთან კონტრაქტსაც გაახანგრძლივებს. თან კაჭარავას სათადარიგოებში მოხვედრაზე სიტყვაც არ არის დაძრული.
“ფამაგუსტის “ანორთოსისი” მალე ნიკა კაჭარავასთან კონტრაქტს გაახანგრძლივებს. მხარეები პირობებზე შეთანხმდნენ – ამის შესახებ ოფიციალური განცხადება მომდევნო ორი დღის განმავლობაში გაკეთდება. მისი მომავლის შესახებ დაიწერა, თითქოს პოზნანის “ლეხია” დაინტერესებული. პოლონელი ჟურნალისტის, კშიშტოფ სტანოვსკის პოსტმა Twitter- ზე, სადაც ის წერს ნიკა კაჭარავასადმი პოზნანელთა ინტერესზე, “ანორთოსისში” გარკვეული ხმაური და შეშფოთება გამოიწვია.
ქართველმა თავდამსხმელმა ჩვენს გამოცემასთან ექსკლუზიურად განაცხადა, რომსურს “ანორთოსისში” მაქსიმალურად დიდხანს დარჩეს. ამიტომ, მხოლოდ მაშინ მიიღებს ოფიციალურ წინადადებას, თუ ეს ფინანსურად ორივე მხარისთვის მისაღები იქნება“, – წერს გამოცემა.
“ლარნაკა სპორტმა” მოთამაშისა და კლუბის შეთანხმების დეტალებიც გაასაჯაროვა: “კაჭარავამ ხელი მოაწერა ხელშეკრულებას, რომლის თანახმად, მას წელიწადში დაახლოებით 200 000 ევროს ანაზღაურება ექნება. ასევე ექნება სხვადასხვა პრემია, რაც პოტენციური წარმატებების შედეგი იქნება. არსებული ხელშეკრულებით კი მას ორ წელიწადში 100 000 ევრო უნდა მიეღო. კაჭარავა კონტრაქტს 2022 წლამდე გააფორმებს. ეს იმის ფონზე ხდება, როცა ბოლო დღეებში ბევრი იწერება ქართველი თავდამსხმელისადმი პოზნანის “ლეხის” ინტერესზე.
მაგრამ არაფორმალური მენეჯერული ლაპარაკის გარდა, “ანორთოსისს” ოფიციალური წინადადება არ მიუღია. “ანორთოსისის” ადმინისტრაცია უკვე დიდი ხანია ფეხბურთელთან მოლაპარაკებებს აწარმოებდა, რათა თანამშრომლობა გაეხანგრძლივებინა. შევიტყვეთ, რომ მხარეები უკვე შეთანხმდნენ ორწლიან კონტრაქტზე, რომელიც უახლოეს 24 საათში გაფორმდება“.
კიდევ ერთი საინტერესო დეტალი, რომელიც კვიპროსულმა გამოცემამ გაავრცელა, კაჭარავას სატრანსფერო ფასს ეხება: “აღსანიშნავია, რომ ნიკას ძველ კონტრაქტში წერია პუნქტი, რომლის მიხედვითაც, მისი წაყვანის მსურველმა კლუბმა ტრანსფერის გამოსასყიდად მილიონი ევრო უნდა გადაიხადოს. არსებული ვითარებისა და მისი კონტრაქტის განახლების გათვალისწინებით, სავარაუდოდ, ეს ციფრი შემცირდება“.
პრიზი დეკემბრის საუკეთესო მოთამაშეს
“არ ინერვიულოთ, არსად არ წავალ. ამ გუნდში რაც შეიძლება დიდხანს დავრჩები“, – ამბობს ფამაგუსტელთა ქართველი თავდამსხმელი.
ამავე დროს, გამოცემა წერს, რომ კაჭარავამ დეკემბრის საუკეთესო მოთამაშისთვის განკუთვნილი საგანგებო პრიზი “ლარნაკა სპორტისა” და “პრინც ოლივერის” მაღაზიების ქსელისგან მიიღო, რომლებმაც ეს პრიზი ერთობლივად დააწესეს.
ჩვენ ერთი ოჯახი ვართ!
ქართველმა თავდამსხმელმა “ლარნაკა სპორტთან” ექსკლუზიურ ინტერვიუში თავადაც განაცხადა, რომ “ანორთოსისში” დარჩენა გადაწყვიტა.
გთავაზობთ ამ ინტერვიუს საინტერესო ფრაგმენტებს, სადაც კაჭარავამ თავის მომავალზეც ღიად ილაპარაკა და იმაზეც, თუ რა სურს ქეცბაიას მისგან…
– დეკემბერში 3 გოლი გაიტანეთ და “ლარნაკა სპორტისა” და “პრინც ოლივერის” მაღაზიების ქსელის ერთობლივი პრიზი მოიგეთ. ამ აღიარების შემდეგ თავს როგორ გრძნობთ?
– მთავარია, ამ თვეში ბევრი თამაში მოვიგეთ. გუნდმა სეზონი ძალიან კარგად დაიწყო. ერთ-ერთ მიზეზი, რის გამოც 3 გოლი გავიტანე, ის არის, რომ გუნდი მეხმარება. ჩვენ ერთსულოვნები ვართ და ყოველთვის კარგია, როცა გაგაქვს. კიდევ უფრო კარგია, როცა გაიტან და გუნდიც იგებს.
– ასევე მნიშვნელოვანია, რომ ახლა გუნდისთვის საჭირო მოთამაშე ხართ…
– ეს არის სტიმული იმისთვის, რომ უკეთ ვითამაშო. ვგრძნობ, გუნდი და “ანორთოსისის” სამწვრთნელო სტაფი ერთი ოჯახია. მე კი ამ ოჯახის მნიშვნელოვანი ნაწილი ვარ.
– წელს გუნდში ცვლილებას ვხედავთ. თქვენი აზრით, რა შეიცვალა “ანორთოსისში“?
– ყველაფერი შეიცვალა. გუნდში ბევრი ახალი მოთამაშე, ახალი თანამშრომელი და ახალი მწვრთნელი მოვიდა. რაც მთავარია, ჩვენ ერთი ოჯახი ვართ მოედანზეც და მის მიღმაც. ეს ჩვენთვის მნიშვნელოვანია და, შესაბამისად, ჩვენთან ყველაფერი კარგადაა, რადგან ჩვენ ერთმანეთისთვის ვიბრძვით და ვთამაშობთ.
– მწვრთნელ ქეცბაიასგან დიდი მოთხოვნებია?
– დიახ (იცინის). მას მოსწონს, როცა ფეხბურთელები თამაშისთვის 100 პროცენტით არიან მობილიზებულები – 99 პროცენტიც კი საკმარისი არ არის. თქვენ ქეცბაიასთან 99 პროცენტით თამაშს ვერ შეძლებთ, ის ყველასგან 100-პროცენტს ითხოვს და ეს მიიღო კიდეც.
– “ანორთოსისი” პირველ ადგილზე ამიტომაა?
– დიახ, ეს არის მთავარი მიზეზი, რის გამოც ჩვენ პირველები ვართ.
– გუნდში ბევრი რამ შეიცვალა და ბევრი ახალი სახე გამოჩნდა – ანალიტიკოსი, მწვრთნელები, სკაუტები და კიდევ ბევრი სხვა…
– ისინი ფეხბურთში ისეთივე მნიშვნელოვანი ფიგურები არიან, როგორც – მოთამაშეები. ისინი მზად უნდა იყვნენ თამაშისთვის და ყველაფერი უნდა გაიღონ, რომ ჩვენ სათამაშოდ და სავარჯიშოდ საუკეთესო პირობები შეგვიქმნან. ანალიზით, ჩვენ შეგვიძლია ვიცოდეთ, მოწინააღმდეგისგან რას უნდა ველოდოთ. ჩვენ რეგულარულად ვემზადებით და ეს არ არის მხოლოდ ის ვარჯიშები, რასაც ხალხი ხედავს. ეს არის ყოველდღიური უმძიმესი სამუშაოს შედეგი, რომელიც თამაშამდე ერთი კვირის განმავლობაში მიმდინარეობს.
– წლის ბოლოს კლუბთან თქვენი კონტრაქტი იწურება. ადმინისტრაციასთან ამის შესახებ არ ისაუბრეთ?
– მე არ ვნერვიულობ! არსად არ წავალ და ამ გუნდში რაც შეიძლება დიდხანს დავრჩები.
– მიმდინარე სეზონში ყველაფერი იმაზე მეტყველებს, რომ გუნდი ევროთასებზე ითამაშებს. ეს მნიშვნელოვანია?
– რა თქმა უნდა, ეს არის მთავარი და ყველაფრის გასაღები. ჯერ ჩვენ უნდა ვიბრძოლოთ და ყველაფერი გავიღოთ, ჩემპიონობა რომ მოვიპოვოთ, შემდეგ კი ვნახოთ…
– გულშემატკივრებს რას ეტყოდით?
– იყავით ჩვენს გვერდით ისევე, როგორც ახლა ხართ. როცა შინ ვთამაშობთ, სტადიონი გადაჭედილია. ახლა წინსვლა უნდა გავაგრძელოთ.
წყარო: lelo.ge
