საქართველოს 19-წლამდელთა ნაკრები ევროპის ჩემპიონატის ელიტრაუნდშია. “ლელომ” ინტერვიუ ჩამოართვა თბილისის “ლოკომოტივის” თავდამსხმელ გიორგი იაკობიძესა და “საბურთალოს” შემტევს გიორგი გულიაშვილს, რომლებმაც 2-2 გოლი გაიტანეს, ისევე, როგორც ზურიკო დავითაშვილმა. ისინი შესარჩევი ეტაპის საინტერესო დეტალებს გაიხსენეს…
გამოჩნდა, რომ დავითაშვილი ნამდვილი ლიდერია
თურმე, როგორი ვნებები ბობოქრობდა ქართველი ახალგაზრდების გულებში – ამის შესახებ გიორგი იაკობიძის ინტერვიუდან შეიტყობთ. თბილისის “ლოკომოტივის” თავდამსხმელი უნგრეთში გამართული მატჩების საინტერესო დეტალებს იხსენებს…
– ძალიან რთულ ჯგუფში მოვხვდით, სადაც პირველ ადგილზე გასვლა კი არა, შემდეგ ეტაპზე მოხვედრაც წარმოუდგენელი ჩანდა. მასპინძელი უნგრეთი და განსაკუთრებით ხორვატია ძლიერი ნაკრებები იყვნენ. მაგრამ ჩვენს გუნდში ისეთი კარგი გარემო იყო, მწვრთნელებმა ისე იმუშავეს და თავად ბიჭები საქმეს ისე მიუდგნენ, პირველზე გავედით – ყველამ აღიარა, რომ ეს დამსახურებული წარმატება იყო. ყველაფერთან ერთად, იღბალიც ჩვენსკენ იყო – პირველივე შეხვედრაში უნგრელებს მოთამაშე გაუგდეს.
– ხორვატებთან შეხვედრა გავიხსენოთ. მათ ყოველთვის ძლიერი თაობები ეზრდებათ და რის ხარჯზე მოუგეთ?
– აქ რამდენიმე ფაქტორმა იმოქმედა. პირველი ის, რომ მეორე ადგილით ელიტრაუნდში კი გავიდოდით, მაგრამ ძლიერ გუნდებს შევხდებოდით, პირველობით კი შედარებით სუსტ ჯგუფში მოხვედრის იმედი გვექნებოდა და რა თქმა უნდა, ეს დიდი სტიმული იყო. ჩვენმა მთავარმა მწვრთნელმა, რამაზ სვანაძემ, თამაში წინასწარ ისე გაგვირჩია, მეტოქე ძალიან კარგად შევისწავლეთ. ხორვატების ყველა პლუს-მინუსი ვიცოდით და ვცდილობდით, რომ მათთვის პლუსების გამოყენების საშუალება არ მიგვეცა. საბედნიეროდ, ეს ყველაფერი გამოგვივიდა. სხვათა შორის, ძალიან დიდი გავლენა თამაშამდე ზუკა დავითაშვილის სიტყვებმა მოახდინა.
– დავითაშვილის?
– დიახ, ბიჭებს ისე მოგვმართა, ყველა მაგრად დაგვქოქა. სასტუმროში ყველა ნაკრები ერთად ვცხოვრობდით, მეტოქეებს ყოველდღე ვხვდებოდით და ასეთ დროს, ერთმანეთს ყველა ერთმანეთს ლიფტში ელოდება, ფეხბურთელები ვესალმებით ხოლმე და მოკლედ, მეგობრულად ვიქცევით. ერთადერთი ხორვატია იყო, რომლის ფეხბურთელებსაც ძალიან თავში ავარდნილი ჰქონდათ, რომ მსოფლიოს ვიცე-ჩემპიონის ქვეყანას წარმოადგენდნენ. 8 თუ 9 ფეხბურთელი ზაგრების “დინამოდან” იყო და 2 მათგანი გუნდის ძირითად შემადგენლობაში თამაშობს. არავის ესალმებოდნენ. ლიფტში ორი კაცი რომ შედიოდა და ორი ქართველი მივდიოდით, პრინციპულად არ გველოდებოდნენ. ამან მთელ ჩვენს გუნდზე იმოქმედა. ზუკამ თამაშამდე გვითხრა – ჯერ იმიტომ, რომ ჩვენს უკან საქართველოა, მაგრად უნდა ვითამაშოთო. მეორეც, ელიტრაუნდში პირველ ადგილზე გასვლით ევროპის ჩემპიონატზე მოხვედრას გავიადვილებთ და მესამე – ხომ გვინდა რომ დაგვაფასონ და ზემოდან არ შეგვხედონ, ჰოდა, გავიდეთ და ბურთი თავზე დავახიოთო. დავახიეთ კიდეც. გამოჩნდა, რომ ზუკა ჩვენი გუნდის ნამდვილი ლიდერია.
– ხორვატებმა თამაშის შემდეგ ხელი ჩამოგართვეს?
– ესეც არ იკადრეს, მაგრამ ჩვენი ხომ მაინც დავუმტკიცეთ და ამაზე აღარ გვიდარდია.
– ასეთი შედეგის შემდეგ ელიტ რაუნდში თქვენგან ყველა ასეთივე წარმატებულ გამოსვლას ელის…
– ჩვენც ამის იმედად ვართ. საბედნიეროდ, ძალიან შეკრული გუნდი ვართ და ამაშია ჩვენი ძალა. ისეთი ფეხბურთელები გვყავს, დარწმუნებული ვარ, ბევრი დიდ ფეხბურთს ითამაშებს და ნაკრებიც ბევრს მიაღწევს.
– ფეხბურთელების კარიერა მსგავსი ტურნირებით იწყება. ტურნირს ბევრი სკაუტი დაესწრებოდა.
– ჩვენც ვიცოდით, რომ ბევრი სელქციონერი ჩამოვიდა. სამიდან სამი თამაში მოვიგეთ, რაც გუნდის სახელისთვისაც კარგი ამბავია და თითოეული ჩვენგანის მომავალსაც წაადგება. ასეთ თამაშებს ყურადღების გარეშე არ დატოვებენ და იმედია, ევროპაში ბევრი ჩვენგანი წავა. მაგრამ მთავარი სხვა რამაა. სვანაძემ ტურნირის დასრულების შემდგე მართალი გვითხრა – თქვენ საქართველოს ფეხბურთის ისტორიაში ლამაზი ფურცელი ჩაწერეთ, ევროპის ჩემპიონატზე გასვლით კი ისტორიაში შეხვალთო. ეს ყველაზე დიდი სტიმულია.
გიორგი გულიაშვილი: ჩვენი მიზანი ევროპის ჩემპიონატზე თამაშია
საქართველოს 19-წლამდელთა ნაკრების თავდამსხმელი გიორგი გულიაშვილი 15 წლიდან ასაკობრივ ნაკრებში თამაშობს და ყველგან თავის წილ გოლებს იტანს. “საბურთალოს” თავდამსხმელმა პირველ შეხვედრაში უნგრელებთან გოლი საჭირო დროს გაიტანა – მეორე ტაიმის 62-ე წუთზე, როდესაც ანგარიში 1:1 იყო. ამ გოლმა უნგრელების გატეხვაში დიდ როილი ითამამაშა. მეორედ კი ხორვატებთან პრინციპულ შეხვედრაში მე-8 წუთზე გაიტანა და ჩვენი 19-წლამდელები დააწინაურა:
– გუნდმა ძალიან კარგად ითამაშა და ცალკე ყველა ფეხბურთელმაც მაქსიმუმი გამოავლინა. თავიდან ჩვენს წარმატებას ვერავინ წარმოიდგენდა, რადგან უნგრეთიც ძლიერი იყო და თან სახლში თამაშობდა, ხორვატია კი ყოველთვის, ყველა დონეზე ანგარიშგასაწევი ძალაა. ყველაზე მთავარი ისაა, რომ სამივე შეხვედრა ჩვენი უპირატესობით მიმდინარეობდა და დამაჯერებლად გავიმარჯვეთ.
– ყველაფერი უნგრეთთან მოგებით დაიწყო. მასპინძლებთან ასეთი უპირატესობა ძნელი წარმოსადგენი იყო…
– ამ შეხვედრას უდიდესი მნიშვნელობა ჰქონდა, რადგან ტურნირს როგორც დაიწყებ, ხშიარდ ასევე აგრძელებ. ეს იყო დიდი მოტივაცია, რადგან პირველ ტურში მოგება მიზნის შესრულებას და სატურნირო ცხრილში მდგომარეობას გაგვიადვილებდა. თამაში კარგად დავიწყეთ, მაგრამ მეორე ნახევარში პენალტით ანგარიში გაათანაბრეს. თუმცა, ამის შემდეგ ძალიან კარგად და მწვავედ შევუტიეთ და აშკარად დავჩაგრეთ.
– იაკობიძე ამბობს, რომ ხორვატებთან პირადი ანგარიშებიც გქონიათ…
– ძალიან ზემოდან იყურებოდნენ და მიხარია, რომ თავისი მიიღეს. არ ეგონათ, რომ მოვუგებდით, მით უფრო ასეთი დამაჯერებელი შედეგით. მაგრამ პირველ ტაიმში ისე ვეთამაშეთ, შანსი არ დავუტოვეთ. მიმაჩნია, რომ ეს ეპიზოდი გუნდმა ტაქტიკურად საუკეთესოდ ჩაატარა, ბიჭებმა კი მწვრთნელის დავალებები კარგად შეასრულეს. ჩემი აზრით, სწორედ ამის ხარჯზე მოვუგეთ. ჩემთვის დასამახსოვრებელი კიდევ ის იყო, რომ მწვრთნელი შეცვლებს დროულად და ზუსტად აკეთებდა. თუ არ მეშლება, დიდი ხანია, შესარჩევი ციკლი ასე წარმატებულად, 9 ქულით არ დაგვიმთავრებია.
– ყაზახეთი აუტსაიდერი იყო, მაგრამ დიდი ფულის გამო დიდი ამბიციებიც გაუჩნდათ – მათთან თამაშზე ყველაზე ნაკლები ყურადღება გამახვილდა…
– ასაკობრივ ნაკრებებში ყაზახებთან მესამედ ვითამაშე. ვერ ვიტყვი, რომ მაგარი ფეხბურთელები ჰყავთ, მაგრამ მებრძოლი გუნდია და წინა ორი თამაში საკმაოდ დაძაბული გამოგვივიდა. მაგალითად, ორი წლის წინ, ყაზახეთის თასზე 17-წლამდელები ვთამაშობდით და დიდი ანგარიშით ვუგებდით, მაგრამ ბოლომდე იომეს და 4:4 დაგვიმთავრეს. ასეთი გუნდია, მებრძოლი და მთელი გუნდი დაცვაში დგას – ამის გამო, მათ დაცვაში შეღწევა რთულია. მაგრამ ჩვენთან არაფერი გამოუვიდათ.
– ახლა ელიტრაუნდს ყველა იმედით ველოდებით…
– ასეთი თამაშების შემდეგ ეს ბუნებრივია. იმედია, წილისყრაში გავიმართლებს, მაგრამ იოლი ჯგუფის იმედი არ გვაქვს. ამ ეტაპზე ასეთი რამ გამორიცხულია. თუმცა, ჩვენი მიზანი ევროპის ჩემპიონატზე თამაშია.
– ტურნირს ბევრი სელექციონერი ესწრებოდა – შემოტავაზებები თუ მიიღე?
– ვიცი, რომ ბევრი სელექციონერი ჩამოვიდა, რადგან ჩვენს ასაკს განსაკუთრებულ ყურადღებას აქცევენ და ბევრი გვაკვირდებოდა. ესეც დიდი სტიმული იყო. ჩვენ კარგად ვიცით, რომ ასეთ შეხვედრებში ტავს თუ გამოვიჩენთ, შესაძლაო, კარიერა ავიწყოთ. მაგრამ კონკრეტული წინადადებებზე ვერაფერს ვიტყვი.
წყარო: lelo.ge