“გადავწყვიტეთ, 11 სექტემბერს 14 საათზე შევიკრიბოთ ქალაქის მერიასთან და მოვითხოვოთ ნებისმიერი გზით კლუბისთვის საჭირო თანხის გამონახვა. ვინაა დამნაშავე მომხდარში, ვინ რას უცდის და ასე შემდეგ, ეს ყველაფერი არ გვაინტერესებს! მხოლოდ ერთი მიზანი გვაქვს – “ტორპედო” უნდა გადარჩეს, გააგრძელოს არსებობა და იყოს წარმატებული კლუბი”, – წერია მიმართვაში, რომელიც ქუთაისელი გულშემატკივრების ჯგუფმა (“ჩვენ ვართ ტორპედო“) გაავრცელა და საპროტესტო აქცია დააანონსა.
სოციალურ ქსელში “ტორპედოს” გულშემატკივრებმა კლუბში არსებული მძიმე ვითარების შესახებ დაწერეს: “ქუთაისის “ტორპედო” ბოლო წუთებს ითვლის! ბოლო რამდენიმე თვის განმავლობაში არაერთი განცხადება გავავრცელეთ გუნდის ირგვლივ განვითარებულ ამბებზე, მაგრამ, სამწუხაროდ, ადრესატამდე ეს მესიჯები გვიან მიდიოდა. ქალაქის მერია, რომლისგანაც ზაალ ჩაჩავასთვის კლუბის ჩამორთმევას ვთხოვდით, თვეების განმავლობაში არ გვისმენდა.
შემდეგ გვატყუებდა! გვიან, მაგრამ მაინც მივედით იქამდე, რომ კლუბი მერიამ დაიბრუნა. თუმცა ჩვენი მოთხოვნა მხოლოდ კლუბის დაბრუნება არ ყოფილა. მას შველა სჭირდება! ფეხბურთელებს, რომლებიც გუნდში 3 თვის წინ მოვიდნენ, დღემდე ერთი ხელფასიც არ აუღიათ. კვლავ უხელფასოდ რჩებიან ის ფეხბურთელებიც, რომლებმაც “ტორპედო” გაჭირვების ჟამს არ მიატოვეს და ბოლომდე გვიერთგულეს.
მაგრამ… მათ მოთმინებასაც აქვს საზღვარი და ჩვენსასაც! ფეხბურთელები აცხადებენ, რომ მიუხედავად კლუბისადმი დიდი პატივისცემისა, ბევრი პრობლემა დაუგროვდათ, რის გამოც იძულებულნი ხდებიან, ვარჯიშებზე უარი თქვან. უკვე თვეებია, გაურკვევლობაშია კახა ჩხეტიანიც. ფეხბურთელებთან საუბარი ყოველთვის მას უწევს… როგორც კახა ჩხეტიანმა გვითხრა, მას უკვე ფეხბურთელებთან საუბრისაც რცხვენია, აღარ იცის, რა უთხრას და პრობლემას საკუთარ თავში ხედავს – ეტყობა, ჩემი ბრალია ყველაფერი, მე ვუშლი ხელს კლუბის განვითარებას და წავალ მეც მაშინო… ამას არ დავუშვებთ! აღარ მოვითმენთ! აღარ მოვტყუვდებით! აღარ გაპატიებთ!” .
ქუთაისელი გულშემატკივრები თანაქალაქელებს აქტიურობისკენ მოუწოდებენ: “ქუთაისს “ტორპედო” სჭირდება. “ტორპედოს” გარეშე ჩვენს ქალაქში ფეხბურთი მოკვდება… მოგიწოდებთ ყველა გულშემატკივარს, ვისაც გული შეგტკივათ “ტორპედოზე“, 11 სექტემებრს 14:00 საათზე მოდით მერიასთან! მოგიწოდებთ ყველა მშობელს, ვისაც პატარა ფეხბურთელები გეზრდებათ, 11 სექტემბერს 14:00 საათზე მოდით მერიასთან და დაიცავით ის მომავალი, რომელსაც თქვენს ბავშვებს ართმევენ!
მოგიწოდებთ ყველა ქუთაისელს, ვისთვისაც ეს ქალაქი და მისი ღირებულებები მნიშვნელოვანია, 11 სექტემბერს 14:00 საათზე მოდით მერიასთან. ქუთაისს “ტორპედო” სჭირდება. “ტორპედო” ქართულ ფეხბურთსაც სჭირდება! გელოდებით, 11 სექტემბერს 14:00 საათზე მერიასთან!”.
შევიტყვეთ, რომ ფეხბურთელები ვარჯიშზე უარს ამბობენ, რადგან საჭმლის ფული და ელემენტარული პირობები აღარ გააჩნიათ და ცხადია, ასეთი მდომარეობა “ტორპედოს” დაქვეითებას გამოიწვევს. ამისთვის აუცილებელია, რომ კლუბი ტენდერზე დროულად გავიდეს და ახალი ინვესტორი გამოუჩნდეს. სხვაგვარად, გუნდი ვერ იქნება იმ დონეზე, რასაც თავისი ტრადიციებითა და ისტორიით იმსახურებს.
წყარო: lelo.ge
