რა ხდება ქუთაისის “ტორპედოს” თავს და რამდენად რეალურია კლუბში ახალი სპონსორის მისვლა? ამის შესახებ ბოლო ცნობა ქუთაისური კლუბის გულშემატკივართა ჯგუფმა “ტორპედო-ფაქტორმა” გაავრცელა.
“ქუთაისის “ტორპედოში“, დიდი ალბათობით, იტალიელები მოვლენ. გერმანული მხარის ინტერესი ჩაცხრა, ისინი კონტაქტზე აღარ გამოდიან, რაც თამაშიდან მათ გასვლაზე მიგვითითებს. მიუხედავად ამისა, ოფიციალური პასუხი მათ ჯერ არ განუცხადებიათ.
იტალიური მხარე კი ისევ მოლაპარაკებების ფაზაშია, ისინი ამჯერად საქართველოს ფეხბურთის ფედერაციის წარმომადგენლებთან გეგმავენ შეხვედრას, რის შემდეგაც მათი პასუხი გახდება ცნობილი. როგორც ამბობენ, ყველაფერი პარასკევამდე გადაწყდება. როგორც ჩანს, “ტორპედოს” საგა დასასრულს უახლოვდება“, – წერენ გულშემატკივრები.
“ლელოს” კი გერმანულ მხარესთან დაკავშირებით სხვა ინფორმაცია აქვს – “აინტრახტის” აქციონერი კაზიმ არიფოვი მხოლოდ იმ შემთხვევაში შეიკავებდა “ტორპედოზე” თავს, თუ ის ეროვნული ლიგიდან გავარდებოდა. მას “ტორპედოს” ევროსარბიელზე გაყვანა და ახალგაზრდა გერმანელებით გაძლიერება სურდა, მეორე ლიგის გუნდით კი, მოგეხსენებათ, ევროპაში გასვლა წარმოუდგენელი იქნებოდა…
მაგრამ, რადგან “ტორპედომ” ეროვნულ ლიგაში დარჩენის ამოცანა, ფაქტობრივად, გადაჭრა, წესით, მოლაპარაკება უნდა განახლდეს. ყოველ შემთხვევაში, “ლელოს” ინფორმაციით არიფოვი საქართველოში ჩამოსვლას გეგმავს.
მაგრამ დაინტერესებულმა მხარემ უნდა იჩქაროს, რადგან კლუბს ვალები დაუგროვდა და ის სასწრაფოდ გასასტუმრებელია…
წყარო: lelo.ge