შოტლანდიურმა “სანმა” გამოაქვეყნა ინტერვიუ პიტერ ჰუისტრასთან, რომელიც ტაშკენტის “ფახთაქორში” შოთა არველაძის ასისტენტია. ჰოლანდიის ნაკრების ყოფილი მოთამაშე ამბობს, რომ შოტლანდიაში დაბრუნებას არ გამორიცხავს. ამავე დროს, აცხადებს, რომ დროა, შოთა არველაძეც ევროპაში დაბრუნდეს.
გთავაზობთ “სანში” გამოქვეყნებული ინტერვიუს იმ ფრაგმენტებს, რომელიც ჩვენთვის საინტერესო თემებს ეხება...
…ექსრეინჯერი ვარსკვლავი პიტერ ჰუისტრა “აიბროქსზე” მწვრთნელად დაბრუნებაზე ოცნებობს. მას შთამბეჭდავი სამწვრთნელო კარიერა აქვს. პლანეტის რამდენიმე საუკეთესო მოთამაშე გაზარდა, მაგრამ მსოფლიომოვლილი ჰოლანდიელი მიიჩნევს, რომ “რეინჯერში” დაბრუნება საუკეთესო სამუშაო იქნებოდა.
ბოლო ორ წელიწადი ჰუისტრამ ტაშკენტის “ფახთაქორში” “აიბროქსის” კიდევ ერთ ფავორიტთან, შოთა არველაძესთან ერთად გაატარა. დუეტი უკიდურესად წარმატებული აღმოჩნდა და მათ ახალი კონტრაქტი დაუდეს. ამასთან, 52 წლის მწვრთნელი გრძნობს, რომ ახლა შესანიშნავი დროა, დაბრუნდეს შოტლანდიაში, სადაც თავს ისე გრძნობდა, როგორც სახლში.
ჰუისტრამ გლაზგოში 5 წელი (1990-1995) გაატარა. ის ამბობს, რომ ისარგებლებდა შოტლანდიაში დაბრუნების შანსით და თვლის, რომ სუპერვარსკვლავებთან მიღებული გამოცდილება გამოადგენა:
“მე გამიმართლა, რადგან “აიაქსში “ბევრ ნიჭიერ მოთამაშესთან ვმუშაობდი. ეს, რა თქმა უნდა, შეიძლება დაგეხმაროთ, რადგან ეს ნიშნავს, რომ შეგიძლიათ ნიჭიერი მოთამაშე ამოიცნო. ჩვენ გვყავდა ისეთი ბიჭები, როგორებიცაა ლუის სუარესი, კრისტიან ერიქსენი, ტობი ალდერვეირელდი და იან ვერტონგენი. “გრონინგენში” გვყავდა ვირჯილ ვან დეიკი. თქვენ მაშინ არ იცოდით, რომ ყველა სუპერვარსკვლავი გახდებოდა.
მსურს, რომ ერთ დღეს “აიბროქსზე” დავბრუნდე. როცა “რეინჯერსში” ჩაირიცხები, სამუდამოდ ამ ოჯახის ნაწილი ხდები. ეს კავშირი ახლაც ძალიან მტკიცეა. ამავე განცდას ჩემს თავსაც ვატყობ და შოთა არველაძესაც. იქ ისეთი ფანტასტიკური დრო გავატარე, ჩემი სამწვრთნელო მოგზაურობის გაგრძელებას ამ საოცარ ქვეყანაში, შოტლანდიაში ვისურვებდი”.
ჰუისტრა თამაშობდა ჰოლანდიაში, შოტლანდიაში, ბელგიასა და იაპონიაში. შემდეგ დაიწყო მწვრთნელობა. “აიაქსსა” და “ვიტესში” ასისტენტად მუშაობდა, დამოუკიდებლად კი ხელმძღვანელობდა “გრონინგენს”, “გრააფსხაპსა” და იაპონურ “ივაკის”, ინდონეზიის ნაკრებსა და სლოვაკეთის “ტრენჩინს”.
ჰუისტრა შოთას კიდევ ერთხელ ახსენებს: “უზბეკეთში ძალიან წარმატებით ვიმუშავეთ, ბევრი გამარჯვება ყოველთვის სასიამოვნოა. მაგრამ მე ვფიქრობ, მე და შოთა ახლა ევროპაში დაბრუნებას ვისურვებდით – იდეაში, სასურველია დიდ ბრიტანეთში მუშაობა და ისეთივე წარმატების მიღწევას შევეცდებოდით. დროა, არველაძეც ევროპაში დაბრუნდეს“.
რამდენად რეალურია ამ ეტაპზე ევროპაში, კონკრეტულად კი შოტლანდიაში დაბრუნება? საქართველოს პირველი არხის გადაცემა “ტაიმ აუტში” ამ თემაზე კომენტარი შოთა არველაძემ გააკეთა.
“არ ვიცი, ჰუისტრა რას გულისხმობდა. ყველას უნდა იმ კლუბში მუშაობა, სადაც უფრო გამოჩნდება – ესპანეთში, ინგლისში, გერმანიაში… მიწვევები მეც მქონდა, თურქეთიდან, ჰოლანდიიდანაც… მაგრამ მიმაჩნია, რომ რაღაც ისეთი წინადადება უნდა მივიღო, რაზეც ავენთები.
რაც იქნება, იქნება. ისე, დიდ ბრიტანეთში მუშაობა როგორ შეიძლება პრიორიტეტი არ იყოს? ანუ იქ მუშაობა, სადაც ყველაზე მაგარი მწვრთნელები და მოთამაშეები არიან და ფეხბურთის ყველაზე მაღალი დონეა? ასე “ბარსელონასა” და “რეალშიც” ძალიან მინდა, მაგრამ სიაში არ ვწერივარ“.
წყარო: lelo.ge